随住C朗拿度、美斯、罗拔利云度夫斯基等殿堂级前锋步入足球生涯尾声，顶级射手已经成为最抢手球员，效力拿玻里嘅域陀奥森汉就获多间豪门垂青，据报曼联同拜仁慕尼黑都有意喺夏天提出收购，拿玻里当然唔会客气，已为呢位尼日利亚前锋标价1.4亿欧元。
23岁嘅域陀奥森汉今季状态巅峰，13场联赛有10球加2助攻，上年夏天拿玻里叫价1亿欧元，据意大利《Il Mattino》报道，拿玻里会长迪罗伦迪斯已将定价提升到1.4亿欧元，而且相信呢个价格系如实反映域陀奥森汉嘅实力，有价亦会有市。
报道指曼联同拜仁慕尼黑系最大买家，曼联想搵C朗拿度嘅代替者，而拜仁亦未填补罗拔利云度夫斯基离队嘅空缺，两大豪门嘅争夺已令拿玻里可以吊高嚟卖，唔排除仲会有其他豪门加入战团，域陀奥森汉只会愈抢愈贵。
