曼联12月最佳球员，相信唔使选都知系边个，就系拉舒福特，曼联官网喺曼市打吡前夕，向福仔颁发12月最佳奖座，希望佢喺曼市打吡继续有好表现。
曼联世盃後至今全胜，12月踢咗3场，计有英联盃赢般尼、联赛赢诺定咸森林同狼队，福仔喺呢3场交出3入球1助攻，其中对狼队一仗佢因为瞓过龙开会迟到被雪藏，下半场放番出嚟即一箭定江山，当选12月最佳实至名归。
但其实拉舒福特嘅走势未完，佢喺1月分头3场都有入球，换句话讲，曼联喺世盃後6场比赛，福仔场场有波入未断缆，6场共入7球2助攻，如果佢喺曼市打吡继续入波，相信曼联1月最佳球员都会系佢。
其实拉舒福特嘅好状态喺11月已开始，世盃前英联盃对阿士东维拉攻入1球，喺世盃为英格兰射入3球，脚风顺得出奇，短短半季已为曼联攻入15球，如果保持走势，今季20球以上走唔甩，30球都有可能。
