利物浦今季成绩大跌，中场问题系致命原因，球会今个月签入荷兰翼锋加普後，依家集中火力为中场添兵。利物浦主要目标系英格兰国脚祖迪比宁咸，不过佢嘅1亿欧元身价为转会添加难度，据报「红军」有意搵平价替身，美国中场尤路斯穆沙成为目标人物。
据西班牙媒体《Fichajes》报道，利物浦已经同华伦西亚就收购尤路斯穆沙进行初步接触，虽然车路士同阿仙奴都有意收购，但利物浦就处於领先位置，而且对利物浦嚟讲，身价约2,500万欧元嘅尤路斯穆沙，收购难度比起1亿欧元嘅祖迪比宁咸细得多。
20岁嘅尤路斯穆沙系阿仙奴青训出身，2019年转会华伦西亚前，喺阿仙奴青年军受训长达7年，所以佢亦符合英超「本土球员」资格，对於本土球员人数不足嘅利物浦亦系一大卖点。
