今季重返英超嘅富咸表现神勇，周五(13日)凌晨击败车路士後，依家杀到上联赛榜第6位，成为17年来英超最强升班球队！富咸今季发威，巴西翼锋韦利安功劳好大，呢位34岁老将上年夏天回流英超童话式翻生，今仗倒戈射爆车路士後更拒绝庆祝，赢尽掌声。
富咸喺英超4连胜，19场联赛累积31分排第6位，成为自05/06球季嘅韦根(34分)之後，头19场联赛最高积分嘅英超新升班球队，当中关键人物系前巴西国脚韦利安，呢位球星曾效力车路士7年，之後转会阿仙奴表现差劲，2021年转会巴甲哥连泰斯「养老」，演出同样麻麻。势估唔到上年夏天转会死线日，韦利安再有机会重返英超，加盟富咸後表现重拾昔日光芒，今季12场联赛已有2入波加2助攻，系富咸进攻创造力最大来源。
韦利安喺倒戈车路士前，已讲明入波都唔会庆祝，果然讲得出做得到，韦利安赛後表示：「今场胜利好特别，富咸值得赢波，虽然车路士状态唔好，但仍然系一支好球队，我喺车路士有7年神奇嘅岁月，所以我非常尊敬佢哋，不过我系富咸球员，一定会为富咸尽力争胜。」
