周五(13日)凌晨英超赛事，上「车」唔够48小时嘅祖奥菲历斯，为车路士闪电披甲即经历灾难，呢位葡萄牙国脚喺下半场因粗野飞铲直接食红牌，连累球队作客1比2不敌富咸，各项赛事连输3场，祖奥菲历斯嚟紧仲要停赛3场，向球迷泼一盘冷水。
喺史达宁、基斯甸普列锡受伤，奥巴美扬被打入冷宫下，由马体会借用唔够48小时嘅祖奥菲历斯亦要正选上阵，不过车路士表现仍然低沉，25分钟富咸翼锋韦利安左路杀入中间起脚，省中杜利奥查洛巴改变方向弹入，半场富咸领先1比0。
车路士换边後2分钟追平，高列巴尼喺门前混战射入，正当车仔谂住乘胜追击，祖奥菲历斯喺58分钟控波甩脚，情急下飞铲抢波踢中对手，被球证直接出示红牌。踢少1个嘅车路士即陷劣势，73分钟富咸由卡路士云尼斯奥斯顶入致胜球，车路士输1比2完场。
车路士斥资1,600万镑借祖奥菲历斯4个月，随住佢食红牌要停赛3场，未来1个月比赛都唔使预佢，领队朴达赛後表示：「呢个系前锋式嘅拦截，佢冇任何恶意，但我明白红牌嘅决定。菲历斯本来踢得好好，你睇到佢嘅质素，所以红牌系特别失望......车路士嘅打击接二连三咁出现，唯一解决方法就系继续努力。」
