阿根廷中场新星安素费南迪斯喺卡塔尔世盃火速上位，拎冠军之余仲当选最佳青年球员，早前获英超劲旅车路士斟介，呢位21岁球星一度「作反」逼宾菲加放人，不过随住交易接近告吹，安素费南迪斯忽然忠心，周三(11日)葡盃入波後特别拍打心口队徽，以示效忠宾菲加。
车路士同宾菲加就安素费南迪斯转会斟介多时，宾菲加坚持要收足1.2亿欧元违约金先会放人，安素费南迪斯上月底一度违抗教练命令，擅自飞返阿根廷过新年。据报车路士依家差唔多放弃收购，安素费南迪斯喺周三葡盃作客华森一仗复出，入波协助球队赢2比0，佢入波後特意向住镜头狂拍心口队徽，再指住地下，话畀球迷知佢对宾菲加忠心耿耿。
宾菲加教练罗渣舒密特赛後表示：「我预期喺冬季转会市场关闭後，安素费南迪斯会继续留喺宾菲加，我从来冇怀疑过佢嘅态度同性格，佢系一个好人，佢好享受为宾菲加比赛。」
