巴塞隆拿季前免费签入比利连，不过呢位27岁右闸未受教练沙维重用，半季只系试过1次喺联赛正选上阵。据报巴塞已决定提早同比利连「斩缆」，今个月畀佢自由转会，盛传贝迪斯好大机会签入呢位前西班牙国脚。
比利连上季由阿仙奴外借贝迪斯，表现获得好评，可惜贝迪斯因财政问题冇能力将佢收购，结果比利连同阿仙奴解约後转会巴塞。比利连喺巴塞又系伤多过踢，右闸亦有巴迪、沙治罗拔图同祖利斯古迪等选择，比利连就变得可有可无。
据《世界体育报》报道，巴塞将同意畀比利连今个月免费离队，以减轻薪酬开支，而贝迪斯後防阿历斯摩兰奴即将转投阿士东维拉，消息指贝迪斯将会签入比利连作为替补，成事嘅话可以话系「3赢结局」。
