曼联喺英联盃8强大胜查尔顿晋级，领队坦哈格喺周六(14日)「曼市打吡」对曼城前已经留力，同上仗英足盃轮换8个正选，偏偏就系正选右闸达洛治「出事」。呢位葡萄牙国脚只系踢咗34分钟就受伤退下火线，而且换出後直接返入更衣室，一仗大战曼城上阵成疑。
达洛治今次受伤地方不明，领队坦哈格赛後试图淡化伤势：「我哋要等检查结果，但系我相信唔系严重问题，换佢系出於预防。」达洛治踢完卡塔尔世盃後带伤归队，到上星期先至啱啱复出，坦哈格原本想借2场盃赛帮佢提升状态，估唔到又再伤出。
今季坐稳曼联正选右闸嘅达洛治，如果赶唔切对曼城一仗复出，云比沙卡就会顶佢个位置，呢位英格兰球星早前被传会喺今个月转会窗离队，目的地可能系母会水晶宫，但达洛治受伤可能会令转会出现阻滞。
