C朗以2亿欧元破世界纪录年薪空降沙特阿拉伯球会艾纳斯，震动全球，土耳其传媒爆出另一震撼消息，就系实力更胜艾纳斯嘅沙特另一豪门希拉尔，打算开出3.5亿欧元年薪邀请美斯加盟，如果成事，C朗嘅年薪世界纪录将被美斯打破，C朗将被逼入绝境。
美斯同巴黎圣日耳门将於今夏约满，暂时只传出美斯口头同意留队，但未有实质性进展，此时爆出C朗以2亿欧元加盟沙特艾纳斯，成为全球最高薪球员，会否影响美斯嘅续约决定，就要佢自己先知。
土耳其传媒Sabah爆料，实力更胜艾纳斯、曾4夺亚冠宝座嘅希拉尔，看见C朗空降沙特後引起嘅连串效应，因此亦蠢蠢欲动，希望邀请C朗死敌美斯加盟，制造更轰动新闻，至於开出3.5亿欧元年薪超级待遇，比C朗嘅2亿欧元年薪高出甚远，消息有待确认。
目前美斯在巴黎圣日耳门嘅年薪系1.35亿欧元，已经攞咗世盃一切完满嘅美斯，相信已开始筹划挂靴安排，面对3.5亿欧元诱惑未必抗拒到，反正已经有C朗引路，佢一齐去沙特挖金养老亦属正路，而且美斯本身早就系沙特旅游大使，同沙特早有关联，空降沙特并唔出奇。
只系一心谂住喺沙特做土皇帝嘅C朗，到时又会畀美斯压住，生涯尾段仲可以点样反压美斯？
