曼联外借中坚艾历拜利去咗法国搵食，仍然「魔性澎湃」，喺周六(7日)晚法足盃64强为马赛对第4级别联赛球队耶尔FC，以一记「夺命穿心腿」踢向对手穆沙尼戴耶心口，导致呢位中场受重伤，需要送入医院治疗。
当时只系开波15分钟，穆沙尼戴耶正在追波，艾历拜利迎面而来，高举右脚直接踩向对方心口，动作非常粗野，球证毫不犹豫向呢位28岁科特迪瓦国脚出示红牌赶出场。
穆沙尼戴耶伤势严重，被逼退下火线，由於佢被踢中胸部，会方担忧佢伤及心脏，立即召唤救护车，送佢入医院接受治疗及检查，幸好冇大碍。
艾历拜利今次恶意犯规，引起舆论猛烈批评，有人直斥佢做出犯罪行为，冇被警方拘捕，算系好彩，亦有人指呢位後衞简直想踢断穆沙尼戴耶嘅肋骨。由於艾历拜利犯规程度非常严重，可能会被法国足总加罚停赛场数。
艾历拜利之前效力曼联6季，但近年大部份时间受伤患困扰，上阵机会非常少，上年8月被外借去马赛，为期1季，估唔到佢已由「玻璃脚」变成「天残脚」，曼联领队坦哈格仲够唔够胆收番佢呢？
至於今场法足盃，马赛凭阿历斯山齐士、班巴迪安各入1球，以2比0击败耶尔FC，打入32强。
