阿仙奴周二(10日)凌晨会喺英足盃第3圈作客牛津联，球会赛前宣布继续推广「No more red」活动，今仗会着起全白色波衫上阵。上年阿仙奴亦曾着呢件特制波衫踢英足盃，被球迷批评肉酸似「底衫」之外，就连比赛都输埋被踢出局！
「No more red」活动嘅目的，系呼吁各界关注伦敦日益猖獗嘅持刀犯案事件，「不要再见红」就系希望唔好再发生血案，阿仙奴同波衫赞助商上年亦特别推出全白战衣，由队徽到赞助标志都系纯白设计，远睇就好似着住件白色底衫一样。
阿仙奴上年英足盃第3圈着呢件波衫作客诺定咸森林，结果以0比1输波出局，不过既然活动咁有意义，阿仙奴亦唔信邪继续坚持，布卡约沙卡、伊美路维等伦敦长大嘅球星亦为白色战衣做Model宣传，或者今年会有更好嘅结局呢。
