根据英国《太阳报》报道，沙特阿拉伯豪门艾纳斯已经同喀麦隆前锋阿布巴卡解约，腾出1个外援名额，畀新加盟巨星C朗注册。呢位37岁葡萄牙射手成为艾纳斯正式球员之後，有望出战1月23日凌晨沙特联赛对伊蒂法克。
艾纳斯原本已经用尽8个外援名额，必须放弃其中1人，C朗先至可以注册，结果同样司职前锋嘅阿布巴卡成为「牺牲品」被解约。
不过，C朗注册之後仍然未能立即上阵，因为佢上季因打烂爱华顿小球迷电话，被英足总判罚停赛2场嘅处分要喺沙特执行，艾纳斯上仗2比0击败艾泰尔，C朗已坐咗1场波监，下仗对艾沙比继续停赛，所以预料对伊蒂法克，将会系C朗嘅沙特联赛处子战。
至於阿布巴卡虽然被解约，但随时可以重返欧洲有更佳发展，因为盛传曼联有意签入呢位即将31岁嘅射手，最讽刺正系用佢代替C朗离队後嘅位置，如果成事，阿布巴卡先至系大赢家。
阿布巴卡曾经效力波图等欧洲球队，佢喺今届世界盃入2球及1次助攻，包括分组赛入波协助喀麦隆以1比0绝杀巴西，相信有能力喺英超立足。
