周日(8日)凌晨英足盃第3圈赛事，狼队同利物浦合演娱乐性十足嘅英超对决，最终踢成2比2平手需要择日重赛。利物浦门将艾利臣比加今场炮制最「精彩」一幕，佢上半场喺毫无压力下，直接将个波传畀狼队前锋射入，重演卡利奥斯喺2018年欧联决赛嘅低级犯错，赛後受到各界抨击。
利物浦今场强阵出击，荷兰新兵加普亦处子登场，门将位置亦起用正选艾利臣比加，而唔系盃赛门将基利靴，估唔到26分钟就出事，艾利臣比加接应回传後踩定个波，随意一脚「猜」咗畀冲前嘅狼队前锋干卡路古亚迪斯，後者收到大礼後第1时间射入。
「红军」落後下积极反扑，达云纽尼斯完半场前接应阿历山大阿诺特长传抽入，半场追成1比1；52分钟穆罕默德沙拿藉狼队後防失误，门前建功反超前2比1，不过狼队後劲凌厉，黄喜灿66分钟近门铲入追平2比2，尾段狼队嘅杜迪高美斯更有入波争议性被判诈胡，最终双方握手言和需要重赛。
艾利臣比加今场送礼，同德国门将卡利奥斯喺2018年欧联决赛送畀宾施马入波一模一样，赛後受到网民疯狂围攻，前热刺中场米高布朗表示：「呢球可以列入史上最差犯错行列。」不过利物浦领队高普就拒绝责怪艾利臣比加：「呢个失球唔应该发生，但艾利臣之前拯救过我哋好多次，而且我哋之後控制战局，只系赢唔到波。」
