车路士喺英超主场0比1不敌曼城之余，仲有2位翼锋史达宁、基斯甸普列锡伤出，加上上仗受伤嘅中场美臣蒙特，以及长抖嘅前锋布查，中前场人脚捉襟见肘，未来联赛抢分更加举步维艰。
今场开波5分钟，史达宁就受伤退下火线，去到22分钟轮到基斯甸普列锡伤出，严重打乱领队朴达部署。屋漏偏逢连夜雨，入替史达宁嘅奥巴美扬状态低迷，结果踢到68分钟又被换走，焗用19岁小将基拉特赫捷臣顶埋余下比赛时间，可见朴达已陷入冇进攻球员可用嘅困境。虽然车仔宣布签入摩纳哥後衞班洛特巴迪亚舒尼，但恐怕帮助唔大。
因此，车路士现时全力抢购萨克达翼锋梅迪克，班主保利同萨克达总监达里祖史拉一齐喺私人包厢睇今场车曼大战，相信系倾交易问题。
早前传出车仔愿意畀6,000万镑固定转会费，再加2,000万镑浮动转会费，收购22岁嘅梅迪克，比阿仙奴开出嘅6,200万镑为高，加上保利亲自同达里祖史拉密斟，睇来成事机会甚高，希望拭救到车仔啦。
