阿根廷中场安素费南迪斯喺世盃一炮而红，拎冠军之余亦获选为世盃最佳青年球员，立即获得英超劲旅车路士垂青，不过佢效力嘅宾菲加唔肯放人，令谈判陷入停滞。据报安素费南迪斯为转会搲烂面，日前擅自飞返阿根廷过年，令宾菲加非常不满。
阿根廷赢世盃冠军後，安素费南迪斯放假庆祝一大轮，上星期先飞返葡萄牙报到，消息话佢「被迫」喺对布拉加场联赛上阵，结果宾菲加惨输0比3。更令宾菲加失望嘅系，安素费南迪斯喺踢完场波後，立即又飞返阿根廷陪家人过新人，虽然宾菲加教练罗渣舒密特极力反对，但安素费南迪斯就阔佬懒理。
据Fabrizio Romano报道，安素费南迪斯同车路士已经倾掂晒转会条件，只系等宾菲加同意放人，虽然佢合约内有1.2亿欧元买断条款，但目前车路士仍然希望可以倾出一个较低嘅价钱，安素费南迪斯嘅行为明显系向宾菲加施压。
