新一年苏超头炮即上演老字号打吡，「2哥」格拉斯哥流浪主场硬撼榜首些路迪。格流易帅後豪取4连胜，为争标今仗一定抢攻，益咗些路迪打反击，两军近3次碰头都系些路迪先拔头筹，不妨捧佢哋「第一队入球」。（Now 638周一晚8时30分直播）
日本球员影响力扩大
格流喺世盃休战期间怒炒云邦贺斯，搵来前助教米高比尔接手後立即翻生，佢领军4仗全部赢晒，信心返晒嚟。依家格流落後些路迪9分咁多，今仗争标「6分波」不容有失，要抢W先可以收窄距离。不过要留意，米高比尔带队嗰4仗中，有两仗系先失波，可见佢呢种以攻代守嘅打法，防线难免会出现漏洞，随时中门大开令实力更强嘅些路迪有机可乘。
些路迪继续壮大东瀛势力，日前宣布借入横滨水手防中岩田智辉，季尾可启动买断条款，连同古桥亨梧、前田大然、旗手怜央、井手口阳介及小林友希，日本球员於些军影响力进一步扩大，其中意外无缘世盃嘅古桥亨梧大踢争气波，近3仗已入4粒，暂以14球位居射手榜榜首，难怪些路迪於世盃後同样4战皆捷。
老字号打吡向来都系打甩髀，近3次碰头法定时间些路迪虽然只得1胜2和，不过呢3次都系佢哋先开纪录，既然格流为抢分要焗攻，些路迪顺势打反击更煞食，再次先入波唔奇。
直播表
周一4:45pm 澳职 阿德莱德联 Vs 珀斯光辉
周一8:30pm 苏超 格拉斯哥流浪 Vs 些路迪
周二凌晨零时 法甲 里尔 Vs 兰斯
周二1:30am 英超 宾福特 Vs 利物浦
周二2:00am 法甲 蒙彼利埃 Vs 马赛
周二4:00am 法甲 雷恩 Vs 尼斯
