曼城周六(31日)英超失分，主场被爱华顿逼和1比1，争标路再受打击。曼城前锋艾宁夏兰特入球停不了，今场射入佢今季第21个联赛入球，但佢上半场曾经粗野飞铲对手，球证网开一面只系向佢出示黄牌，冇被赶出场相当够运。
曼城面对死守嘅爱华顿，控制战局但系埋门唔多，24分钟马列斯杀入禁区传中，艾宁夏兰特第1时间抽射入网，呢球亦系曼城上半场唯一中目标攻门。艾宁夏兰特今场频频被对手硬朗拦截，愈踢愈火滚，44分钟从後双脚飞铲米高兰高，只系换嚟黄牌真系执到。
换边後曼城仍掌握主导权，但爱华顿1次攻势就入波，迪马雷格雷禁区犄角位轰入世界波；曼城尾後发动狂攻，但都逃唔过比克福特五指关，最终两队踢成1比1平手。前英超球证禾顿表示：「艾宁夏兰特冇食红牌真系好幸运，佢嘅飞铲系带住怒火，又快又大力，佢绝对系个幸运星。」
