英超球队般尼茅夫季初0比9惨败於利物浦脚下之後，当时领队柏加被炒，呢位42岁英格兰籍少帅依家有新工，成为比利时劲旅布鲁日新教练，意味将会领军出战2月展开嘅欧联16强赛事，但柏加过去教波成绩欠佳，恐怕难登大雅之堂，难怪网民寸布鲁日今次系「自杀式」换帅。
布鲁日连续3场联赛失分，排第4位，对於呢支传统劲旅而言，成绩难以令人接受，会方早前宣布解雇教练贺夫根斯，曾经传出有意聘请前比利时国家队主帅马天尼斯接手领军，但最终搵来柏加执教，令人大感意外，因为佢之前执教富咸期间，呢支伦敦球队2次由英超降落英冠。
虽然柏加带领般尼茅夫升上英超，但到咗最高水平联赛，又系教唔掂，所以佢今次转战比甲，前景备受睇淡，特别系布鲁日将於2月出战欧联16强对宾菲加，以柏加嘅资历，恐怕难以应付呢项大赛。
