周一(2日)凌晨英超赛事，车路士作客被诺定咸森林逼和1比1，近7场联赛只得1胜，依家落後第4位嘅曼联7分，距离欧联资格愈嚟愈远。车路士班主保利为救亡，1月转会窗决定再开水喉，准备狂签5名球员救亡，赛前成功倾掂3,500万镑收购法国中坚班洛特巴迪亚舒利，而且好戏陆续有嚟。
车路士今季成绩令人失望，开季冇耐就将杜曹炒鱿，但朴达上任後并冇起色，今场虽然有史达宁喺16分钟先开纪录，但森林嘅反击比车路士更加入肉，63分钟凭奥里亚混战中窝利抽入，车路士尾段想谷又谷唔起，最终踢成1比1平手。车路士近7场联赛第6度失分，依家喺绩分榜只排第8位。
车路士季前用超过2.5亿镑增兵，但成绩不进反退，班主保利1月继续科水，早前已宣布签入科特迪瓦前锋大衞科芬拿，据报啱啱呢个周末再搞掂多2单转会，包括1,100万镑收购华斯高嘅巴西中场安迪利山度士，呢位18岁新星已由家人陪同下飞抵伦敦做体测，转会文件亦准备妥当，完成体测後就会正式签约。
效力摩纳哥嘅法国中坚班洛特巴迪亚舒利，据报亦已同意加盟车路士，周一会喺伦敦做体测，双方会签约至2029年6月，车路士将支付3,500万镑转会费。除咗大衞科芬拿、安迪利山度士同班洛特巴迪亚舒利外，车仔亦正同宾菲加斟购阿根廷中场安素费南迪斯，以及洽谈借用马体会前锋祖奥菲历斯，如果全部成事，车路士实力将大大提升。
