英超劲旅车路士周四(29日)宣布，球队已成功罗致科特迪瓦前锋大衞科芬拿，转会费据报为1,050万镑，呢位20岁前锋唔单止被称为「新杜奥巴」，亦系艾宁夏兰特喺莫迪嘅小师弟，依家车路士前锋人手短缺，大衞科芬拿有望即刻占据主力位置。
车路士发声明证实：「球会同莫迪就大衞科芬拿转会达成协议，呢位20岁前锋会喺2023年1月1日加盟，欢迎大衞科芬拿！」呢位科特迪瓦新星上星期过20岁生日，莫迪声明指佢一直希望跟随科特迪瓦传奇杜奥巴嘅步伐，依家终於梦想成真。
大衞科芬拿今季为莫迪喺各项赛事入21球，被视为艾宁夏兰特之後，莫迪出产嘅最强前锋。车路士早前有前锋布查重伤长抖，奥巴美扬又状态低迷，另一新签前锋尼干古就要明年夏天先加盟，大衞科芬拿有望喺下半季即刻成为车路士主力。
