阿根廷中场安素费南迪斯喺今届世界盃表现一鸣惊人，并当选为赛事最佳年轻球员，呢位21岁新星成为各大球会争夺目标，继传出利物浦计划签佢之後，另一支英超球队纽卡素亦加入抢人，甚至准备用1.05亿镑直接向宾菲加买断安素费南迪斯嘅合约。
葡萄牙《球报》爆料，指纽卡素喺班主沙特阿拉伯主权基金支持之下，曾经出价8,800万镑收购安素费南迪斯，但被宾菲加拒绝。「喜鹊」财大气粗，唔想再拖拖拉拉，知道安素费南迪斯现时毁金约为1.05亿镑之後，准备直接用呢个数额买断佢，到时宾菲加冇得再拒绝。
安素费南迪斯亦唔抗拒转投纽卡素，话一切转会事务交由经理人处理，自己只会专心比赛。纽卡素今季表现大勇，成为英超争标份子，如果签到安素费南迪斯，肯定如虎添翼。
