周五(6日)凌晨英超「双蓝大战」，曼城主帅哥迪奥拿尽显大师级临场调动，当比赛陷入僵局时，果断作出换人，并凭2位後备上阵球员基亚利殊、马列斯合作创造入球，作客以1比0击败车路士，追近同榜首阿仙奴至5分距离。
哥迪奥拿又喺大战玩怪阵，几乎出事，由平时惯用嘅433阵式改为361，包括用左闸祖奥简斯路出任右翼，另外自世界盃之後沦为後备嘅菲尔科顿，今仗却获得担正，导致「蓝月亮」上半场陷入劣势，如非车路士小将卓克禾美卡射门中柱，恐怕曼城已经落後。
换边之後，哥迪奥拿立即作出2个调动，用文路尔艾简治、列高路易斯入替基尔获加、祖奥简斯路，变番433阵式，曼城随即获得入波黄金机会，可惜尼敦阿基头槌攻门中楣弹出。
踢到60分钟，哥帅再换2人，用基亚利殊、马列斯入替菲尔科顿、贝拿度施华，呢招立竿见影，仅过3分钟，基亚利殊横传，由马列斯近门射入打开纪录。马列斯成为自2018年以来，後备上阵取得最多英超入波嘅球员，达到9球，佢上仗亦有1次助攻，状态非常出色。
另外，曼城亦成为自1960年保顿之後，第2支连续4次击败车路士，兼保持不失球嘅球队，名副其实系拆车高手。
