女子足球愈来愈受欢迎，唔少球员更加系美貌与技术并重，克罗地亚新星安娜马高域(Ana Maria Markovic)被誉为世界最靓女子足球员，呢位23岁前锋希望「男女平等」，呼吁球迷同网民唔好再戴「有色眼镜」睇女子球员，应该更重视姐妹们嘅球技。
身高1米73嘅安娜马高域拥有天使面孔、魔鬼身材，外形似模特儿，加上不时喺社交网派「福利」，已成为网红，佢嘅Instagram(IG)有超过185万「粉丝」。
安娜马高域话相比起男子球员，女子球员喺社交网上经常被歧视同性骚扰：「当我同艾宁夏兰特同样将喺泳池边嘅相片放上社交网，网民留言好唔同，佢哋只会喺我IG留下有关性嘅说话，但一定唔会咁样对待夏兰特。」
安娜仲话唔想被封为最性感女子球员，至於最靓女子足球员就可以接受，但最希望都系球迷欣赏女子球员喺球场上嘅表现。
安娜马高域现时效力瑞士球队草蜢女足，据悉有英超女子队想签佢，安娜表示暂时无意转会，但将来唔排除去英国挑战自己。
