C朗离队之後，曼联愈战愈勇，继早前打入英联盃8强後，再喺周三(28日)凌晨英超主场以3比0大胜诺定咸森林，创下球队近8个月最大联赛胜仗。拉舒福特延续世界盃勇态，今仗入1球及1次助攻，证明自己可以成为红魔鬼锋线新灵魂。
曼联今场赢得非常轻松，开赛19分钟就打开纪录，基斯甸艾历臣开出角球，拉舒福特接应第一时间劲射入网，继上场英联盃建功之後，又再入波。仅过3分钟，拉舒福特左路横传畀安东尼马迪尔射成2比0，上半场已经奠定胜局。
换边之後，曼联主帅坦哈格频频换人，畀加拿祖、云迪碧克、费特等副选上阵「松筋骨」，费特把握机会表现身价，临完场前接应同胞卡斯米路传送，射成3比0，亦系呢2位巴西国脚首次合作为曼联喺英超创造入球。
主角拉舒福特当选今场最佳球员，呢位25岁前锋近年曾陷入低潮，上季为曼联上阵32场仅入5球，但今季大翻身，踢21场已入10球及4次助攻，换言之未到半季，入波已经多过上季一倍，加上佢喺今届世界盃亦为英格兰轰入3球，仲多过「三狮兵团」首席射手哈利卡尼，「福仔」大爆发，对於曼联及英格兰国家队都系天大喜讯。
另外，曼联对上1次英超赢3球或以上，已经系今年5月初主场赢宾福特3比0，今仗再尝大胜滋味，证明上月同C朗解约系正确决定。曼联现时仅落後第4位热刺1分，而且踢少对方1场，争入英超前4位形势乐观。
