周四(29日)凌晨英超赛事，曼城有挪威神锋艾宁夏兰特「起孖」，作客3比1轻取列斯联，喺联赛榜追近「1哥」阿仙奴至5分差距。今场2个入球，令艾宁夏兰特只系用14场波时间，就喺英超达到20个入球大关，成为英超史上最快入20球嘅超级射手！
曼城今场控制战局，但面对列斯联死守显得老鼠拉龟，基亚利殊就错失多次黄金机会，直到上半场补时，洛迪卡斯简迪补射建功先至打开缺口。曼城领先後踢得更顺，艾宁夏兰特喺51分钟同64分钟，2度接应基亚利殊助攻梅开二度，主队73分钟靠角球由柏斯高史杜尔克破蛋，但无阻曼城全取3分。
今夏加盟曼城嘅艾宁夏兰特，继续用入球改写英超历史，佢用14场联赛就攻入20球，将菲腊斯保持嘅最快英超20球纪录(21场)大幅推前；今届各项赛事攻入26球，亦超越美斯、伊度奥、阿古路同亨利等传奇射手，成为哥迪奥拿领导下最快入25球球员，数据惊人。
艾宁夏兰特赛後表示：「见到其他球员喺世盃入波同赢波，更加激发起我嘅决心同斗心，我喺更衣室同队友讲今场本来可以入5球，呢个系事实，但足球就系咁，我可以点做？我要再练习多啲。最重要系曼城赢波，阿仙奴依家排榜首，我哋要狙击佢哋！」
【英超最快入20球球员】
1 艾宁夏兰特 14场
2 菲腊斯 21场
3 高尔 23场
4 云尼斯达莱 26场
4 迪亚高哥斯达 26场
4 耶保亚 26场
