利物浦捷足先登签入曼联斟介多时嘅荷兰国脚加普，事件喺曼联球迷间引起热烈讨论，原来系同格拉沙家族有关。格拉沙家族早前决定出售股份，唔打算再投入资金收购球员，亦从未报价斟介加普，卒之畀利物浦抢走埋。
加普一直系曼联头号引援目标，领队坦哈格更点名要签佢，大家都认为曼联好快会同燕豪芬报价倾转会事宜，但结果唔系咁样。英国传媒爆料指，格拉沙家族决定出售股份後，唔会再投入资金，坦哈格更接到通知，如果想签加普，就同燕豪芬倾借用协议，冇谂过使钱。
结果利物浦喺世盃後同燕豪芬接触，并完成转会谈判，当消息公布後曼联球迷大感震惊，但又感到无奈，有球迷表示：「加普事件令我感到难受，球会嘅痛苦没完没了。」亦有球迷指出：「兰历克去年要求签入路尔斯戴亚斯，今年坦哈格指名要签加普，结果全部去晒利物浦，曼联6年冇冠军唔系冇原因嘅。」
