当全世界以为今季英超系阿仙奴同曼城之争嘅时候,纽卡素静静起革命,喺周一(26日)晚作客以3比0大胜李斯特城,升上第2位,呢支「新土豪」随时可以令英超大变天。
纽卡素自上年10月被沙特阿拉伯主权基金收购之後,大肆增兵迅速壮大,今季走势锐不可当,今仗作客李斯特城,上半场已经由基斯活特、米基尔阿米朗、祖连顿各入1球,一早奠定3比0胜局。
中场米基尔阿米朗今季英超上阵16场已入9球,等於佢之前效力纽卡素4季嘅联赛总入球数字,呢位28岁巴拉圭国脚大爆发,成为「喜鹊」高飞嘅大功臣。
此外,纽卡素主帅艾迪侯域今年领军赢咗21场英超,成为继奇云基瑾、伊云斯之後,第3位单年取得超过20场英超胜仗嘅英格兰籍领队。
奇云基瑾执教纽卡素时期,曾於1994年取得24场英超胜仗,1995年赢23场,至於伊云斯担任利物浦主帅时期,曾於1996年赢22场。
不过要留意纽卡素虽然领先第3位曼城1分,但踢多对方2场,第2位置并唔稳阵。