阿根廷赢得世盃冠军後，一众国脚返国举行多场庆祝派对，不过曼联领队坦哈格日前就催利辛度马天尼斯归队，叫佢要明白「红魔鬼」需要佢即刻回归帮手。不过前法国世盃冠军成员拿保夫表示，坦哈格咁做随时得不偿失，呼吁佢畀多啲时间利辛度马天尼斯。
现年54岁嘅拿保夫，系法国赢1998年世盃冠军嘅中坚，对捧世盃嘅感受肯定比坦哈格丰富，呢位前车路士球星表示：「当球员啱啱赢世盃冠军，个领队就叫佢即刻准备返球会比赛，咁样系行唔通，坦哈格要畀佢静下，如果曼联想有一个100%嘅马天尼斯，就唔好即刻用佢。」
拿保夫解释：「我都经历过呢个情况，赢到世盃之後，我会谂踢足球仲有乜嘢目标？所以需要时间重返现实，呢个系好正常嘅事，我畀坦哈格嘅忠告系，依家唔好骚扰利辛度马天尼斯。」
