要数球坛「麻烦夫妇」，阿根廷前锋莫路伊卡迪同娜拉认第2，相信冇人敢认第1。两人今年9月宣布分手後，依家正办理离婚手续，娜拉喺圣诞节就喺IG开直播同球迷见面，估唔到莫路伊卡迪竟然踩场，喺直播入面同娜拉开火。
娜拉喺直播入面交代自己嘅状况：「我依家系单身，自己一个人，离婚唔系因为有第2个，只系单纯决定分开。」莫路伊卡迪突然喺直播入面留言回应：「唔好当人系白痴啦！」又话：「你啲视像电话烦到我癫。」娜拉对莫路伊卡迪嘅留言并冇回应，莫路伊卡迪最後留言：「你就系天字第1号毒物？」
莫路伊卡迪当初被指「勾义嫂」，喺队友麦斯卢比斯手上抢走娜拉，搞到对方离婚收场，娜拉之後同莫路伊卡迪结婚，仲做埋佢经理人，唔少球会都对娜拉避之则吉，莫路伊卡迪离开国际米兰都系娜拉一手策划。29岁嘅莫路伊卡迪目前效力土耳其加拉塔沙雷。
