冬季转会窗仲有几日先展开，英超狼队已率先炮制第1单重磅交易。狼队喺圣诞节官方宣布罗致巴西国脚前锋马菲奥斯根夏，佢1月份会先由马德里体育会以借用身份加盟，明年夏天「强制性」买断，据报转会费为破狼队纪录嘅5,000万欧元。
狼队喺10月将葡萄牙领队般卢拿治炒鱿，上月落实聘用西班牙主帅卢比迪古，力图下半季重振雄风。球队亦喺转会窗作出支持，率先罗致23岁前锋马菲奥斯根夏，佢上星期飞英国进行体测，签约後着12号波衫，由於要等转会窗1月1日重开先可以注册，加上申请工作证需时，最快1月5日作客阿士东维拉嘅联赛先可以上阵。
马菲奥斯根夏曾8次代表巴西国家队，系上年赢奥运金牌嘅功臣，不过早前未有入选世盃大军，但预期仍会系巴西未来组军重要成员。呢位前锋上年加盟马德里体育会後，未获教练施蒙尼重用，所以佢亦想转换环境，最终成为卢比迪古执教狼队後第1签。
马菲奥斯根夏接受狼队官网访问话：「我难以想像咁开心，第1日见队友佢哋已经畀我热烈欢迎，今次转会对我同屋企人都非常重要，我亦对狼队嘅计划好有信心，最重要系我能够重拾欢乐。」马菲奥斯根夏喺狼队会同前队友迪亚高哥斯达重逢。
