葡萄牙前锋祖奥菲历斯喺世盃表现出色，迅即成为1月转会市场抢手货，由於马德里体育会教练施蒙尼认为佢唔适合球会体系，已同意畀佢1月离队，法国媒体《Le 10 Sport》报道，曼联同阿仙奴都已提出借用，而且已进入最後阶段，祖奥菲历斯下一站唔系「红魔鬼」就系「兵工厂」。
呢单震撼消息嚟自权威记者Alexis Bernard，报道指马体会将索取900万欧元嘅半年借用费，并会加入约1.2亿欧元嘅买断条款，呢个数字亦系马体会喺2019年签佢嘅「成本价」。据报曼联同阿仙奴都正同祖奥菲历斯经理人佐治文迪斯进行交涉，睇下最後目的地系边度。
曼联上月同C朗拿度解约後，急需补充前锋球员，祖奥菲历斯就被视为最佳人选，而阿仙奴有前锋加比尔捷西斯做手术长抖，亦希望补充前锋为下半季争标冲刺。
