喺今届世盃再陷生涯低点嘅C朗拿度，据报即将加盟沙特阿拉伯豪门艾纳斯。法国媒体报道，C朗周四(22日)已飞抵沙特阿拉伯，并疑似喺利雅得机场现身，据报佢将会签一份2年半合约，消息指艾纳斯正全力催谷呢单转会，希望喺数日之内落实。
法国媒体《Foot Mercato》报道，有人影到C朗已经飞抵利雅得机场，不过相片时间性仍未证实。报道指呢位葡萄牙球星现身沙特阿拉伯倾合约，就系佢考虑加盟艾纳斯嘅最大讯号。消息指C朗原本抗拒去沙特阿拉伯踢波，但明白喺欧洲已经搵唔到佢想要嘅目标(加盟欧联球队)，加上沙特阿拉伯球迷嘅热情同艾纳斯嘅诚意，令佢觉得喺沙特阿拉伯会受到欢迎，所以改变主意。
沙特阿拉伯媒体报道，艾纳斯正全力推动转会，认为依家系提出斟介以来「最接近成事」嘅时刻，佢哋希望数日内火速达成协议。《Foot Mercato》早前指艾纳斯向C朗开出嘅年薪高达2亿欧元，合约会去到2025年6月。
