今晚英联盃16强焦点赛事，曼联主场迎战般尼。「红魔鬼」多位主力啱啱踢完世盃冇耐，需要时间休息，预料今仗唔会上阵，以副选出击下不宜高估。英冠球队般尼出名硬净，随时出现拉锯战，加上双方近6次对赛有4次总入球开2球或以下，宁愿拣中位数2.5球嘅入球细。（HOY TV 77台、有线661及601台周四凌晨4时直播）
曼联喺世盃前夕已经同射手C朗解约，加上另外两位进攻主力拉舒福特及般奴费南迪斯所属国家队，都踢到世盃8强阶段，相信领队坦哈格喺英联盃会收起佢哋，留力应付嚟紧嘅英超「圣诞快车」，锋线变相选择唔多，最大机会系由安东尼马迪尔、加拿祖及艾兰加合作攻坚，攻力无疑较平时打折扣。
留力应付圣诞快车
事实上，曼联喺世盃期间，由一班副选担正踢热身赛表现麻麻，分别以2比4输畀卡迪斯，以及0比1不敌贝迪斯，加上有「圣诞快车」後顾之忧，今仗相信会放慢比赛节奏，就算赢都系小胜居多。
另一边厢，英冠12月中已经重开兼踢咗两轮，般尼先後击败昆士柏流浪及米杜士堡，比赛状态明显较「红魔鬼」优胜。呢支向来以踢法硬净见称嘅球队，现时高踞英冠榜首，论战斗力唔会输蚀英超球队好多，作客半力出击嘅曼联，亦有一战之力。睇番双方近6次交手，有4次总入球开2球或以下，包括最近一次喺今年2月打和1比1，今晚博入球细比较稳阵。
