「红魔鬼」曼联休战1个几月後，周四(22日)凌晨英联盃第4圈主场出击对般尼，多位世盃国脚都回归挂帅，当中拉舒福特延续喺卡塔尔嘅勇态，包括个人表演带足4份3个球场轰入靓波，带领曼联赢2比0杀入8强。今场亦系曼联同C朗拿度解约後第1战，「福仔」即显示出担大旗能力，意义重大。
曼联今场意外排出强阵，杀入世盃8强嘅般奴费南迪斯、拉舒福特、卡斯米路都提前归队正选上阵，对住英冠嘅般尼明显高几班，27分钟云比沙卡右路底线传中，基斯甸艾历臣龙门口接应撞入。57分钟拉舒福特喺自己後场拎波，沿边路不断推进，般尼球员就边守边退，去到禁区顶突然变速喺2名守将中间突破，随时射远柱死角入网，为曼联锁定2比0胜局。
25岁嘅拉舒福特喺今届世盃有出色表现，唔系正选嘅佢亦有3个入球进帐，佢赛後讲番呢个入波：「当时前面有好多空位，我喺度等紧合适时间交波，但突然见到前面开咗条路，所以我就决定自己去埋。」对於世盃後立即重返曼联，佢就话：「最大难题系精神上克服出局嘅失望，但我哋总要收拾心情，今场我好享受为曼联上阵。」
曼联上月宣布同C朗提前解约，今仗就显示出拉舒福特接班嘅能力，领队坦哈格表示：「拉舒福特踢得好好，佢一直系最大威胁，无论盘扭定走位都制造好多危险攻势。」英联盃8强已有7队诞生，曼联之外仲有狼队、修咸顿、李斯特城、纽卡素、诺定咸森林同查尔顿，利物浦对曼城周五(23日)胜方会拎最後一席。
