基利安麦巴比喺决赛连中三元，最终都未能为法国捧盃，赛後相当沮丧，法国总统马克龙赛後都有走到球场上安慰，仲揽住几次，颁奖果阵仲同麦巴比讲左一轮嘢，但呢位法国前锋面对总统嘅好意唔系太想交流，有网民讽刺咁话「麦巴比心里面可能谂『总统你畀我静吓啦』」。
当麦巴比为法国开斋射入12码时，喺VIP席上嘅马克龙开心到跳起，但最终法国喺加时後输12码，特别飞到卡塔尔撑场嘅马克龙赛後走到球场，安慰一众国脚，更走呆坐喺球场嘅麦巴比身旁安慰及拥抱鼓励，但麦巴比被揽一揽後，就离佢而去。
而有份颁奖嘅马克龙，亲手将神射手奖项颁畀今届累积入左8球嘅麦巴比，喺台上再遇麦巴比，今次更摸住佢个头兼同佢讲两句，但见呢位神射手已经同佢无视觉交流，个样有啲不耐烦，不过，话晒都系总统，点都要畀面听埋佢讲嘢，而总统未揽完佢已经伸手同其他嘉宾握手，想快啲走番落台。
马克龙赛後接受访问时话:「我同佢讲，你只系23岁，但已经系世盃神射手，亦赢过世界盃；我同你一样难过，但你令国家感到骄傲，我哋非常接近，只系输左一场，比赛就喺咁样。」
