法国喺世界盃决赛踢到互射12码先至败阵，其实已经「赚咗」，呢支上届盟主大部份时间表现欠佳，好大程度上由於领队迪甘斯用错人，结果上半场41分钟就焗住作出调动，换走基奥特同奥士文尼迪比利，打乱部署。
法国开赛後起码有70分钟系梦游球场，特别上半场连1次射门都冇，仲要失2球。奥士文尼迪比利成为罪人，侵犯迪马利亚，连累球队被判罚12码，并愈踢愈荒失失，呢位巴塞隆拿翼锋以往出名纪律差，迪甘斯搵佢孭重飞，真系自食其果。
至於基奥特盛传有伤在身，迪甘斯仍然要佢担正，又系一大失策。反观後备上阵嘅高路梅安尼表现出色，制造唔少威胁，包括博到1球12码，为法国大反攻拉开序幕。
基利安麦巴比射入扳平2比2嘅一球，两位後备上阵球员京士利高文、马古斯杜林亦好有功劳。
