今届世盃决赛焦点，除咗系阿根廷定法国，边队会第3度封王外，两军射手亦要为金靴奖争崩头。未计季军战，阿根廷王牌美斯与祖利安艾华利斯，以及法国「双基」基利安麦巴比与基奥特，占据射手榜头两位，争持激烈属近年罕见，要斗埋决赛先知金靴谁属。
简单讲讲射手榜形势，美斯与麦巴比同样攻入5球，位居榜首，而祖利安艾华利斯与基奥特则以4球紧随其後，咁啱4人都要打决赛，边个有波入，就好大机会夺金靴。不过大家要留意，国际足协嘅金靴计法，当然系先计入球数，若果有多名球员入球数目相同，就会由助攻次数多寡决定，假如连助攻数字都一样，则由上阵时间最短嘅球员获奖，暂时嚟睇，美斯贡献3次助攻，比麦巴比多1次稍为占优，祖利安艾华利斯与基奥特唔单止落後1粒，两人更加0助攻，相对下比较输蚀。
提提大家足智彩嘅「神射手」计法，只计算入球数字，如果超过一名球员平头胜出，每一胜出选择嘅投注金额，将按平头胜出人数分为相同数目嘅等份，彩金以一等份嘅投注金额乘以相关赔率计算。例如当两名球员入波数目一样，投注两位射手嘅注项都能胜出，每注金额嘅一半会获得派彩。
