今晚世盃季军战克罗地亚对摩洛哥，虽然两队喺今届赛事以防守为主，但嚟到象徵性质为主嘅季军战，双方冇晒心理包袱，可以尽情享受快乐足球，会大踢开放式足球斗攻。事实上近11届世盃季军战有10次总入球开3球或以上，不妨再追中位数2.5球嘅入球大。
克罗地亚今届正选阵容年龄较大，主将莫迪历更加已经37岁，所以球队喺晋级过程中，往往踢得较为保守，以节省体力。嚟到季军战，预料领队达历会大幅轮换阵容，畀班较年轻嘅副选落场，提升球队活力之余，亦等佢哋感受世盃气氛。呢批副选球员为争上位，势必落力表现自己，希望尽量入多几球为未来前途铺路。
安尼斯利够卡士入波
「非洲奇兵」摩洛哥虽然今届6战仅入5球，但佢哋比赛过程之中，表现并唔保守，往往由中场开始压迫对手，再施以快速反击，非常够侵略性，只可惜把握力稍逊，浪费唔少入波机会。球队杀入4强已经超额完成，球员今晚压力亦较细，有利改善埋门一脚。其中效力西维尔嘅前锋安尼斯利射术及顶上功夫同样唔错，佢今届有两球进帐，摩洛哥有本钱攻入克罗地亚大门，双方可望合演入球骚告别今届之旅。
