陈滢Kylie C陪你喺《彩报》玩转世盃：https://win.on.cc/football/
西班牙在世盃出局後立即换帅，由U21教练富安迪接替安历基帅印，新帅上任後表示要搵班老队员交谈，仲爆出惊人言论，就系前队长沙治奥拉莫斯可以重返国家队。
61岁嘅富安迪教过晒U19、U21及U23，赢过U19、U21欧国盃冠军同东京奥运银牌，原来佢仲睇住沙治奥拉莫斯成长，同佢家人好熟，佢话：「我会同国家队一啲重量级人物交谈，沙治奥拉莫斯系创造西班牙历史嘅球员，我需要佢哋。」
重召沙治奥拉莫斯，相信唔少人都好惊讶，但富安迪就觉得好正常：「咁样好正常，我想同佢哋展示我嘅想法，以便佢哋加入我嘅战术，我要组建一个团队。」佢仲话国家队大门为每个人敞开，唔会拒绝任何一位球员。
36岁嘅沙治奥拉莫斯为西班牙上阵180场入23球，系西班牙历来上阵次数最多球员，赢过2010年世盃、2008及2012年欧国盃冠军，胜出131场亦系西班牙纪录，佢对上一次代表西班牙国家队已经系2021年3月，连续错过去年欧国盃及今届世盃两项大赛，如果获重召，将可继续刷新国家队纪录。
