荷兰喺世界盃8强对阿根廷，一度落後2球，韦格贺斯78分钟後备上阵後，形势出现大逆转，呢位身高1米97嘅前锋利用身型优势冲击对方防线，并梅开二度，令荷兰得以进入加时及互射12码决胜负，即使「橙衣兵团」落败，但韦格贺斯已一战成名。
现年30岁嘅韦格贺斯曾经效力阿尔克马尔、禾夫斯堡、般尼等球队，今季被般尼外借去土耳其球队比锡达斯後，有出色表现，踢13场联赛入6球，因而获得荷兰主帅尹戈尔垂青，入选国家队出战今届世界盃。
韦格贺斯首场世界盃对塞内加尔，并冇上阵，近4场都系比赛末段，先至获得披甲，估唔到今仗演出一鸣惊人，头顶脚踢入2球，其中补时10分30秒射入扳平2比2嘅一球，成为OPTA自1966年有统计以来，世界盃法定时间最迟入波。呢位大器晚成嘅球员喺互射12码阶段，亦有操刀射入1球。
韦格贺斯唔止入波，仲激嬲对手美斯，呢位阿根廷球王赛後接受访问时，喺镜头前破口大骂附近嘅韦格贺斯系傻仔，据悉美斯不满佢踢法太茅，喺比赛中不断侵犯及挑衅阿根廷球员。韦格贺斯表示想搵美斯握手，但对方拒绝，仲口出恶言。
不过，韦格贺斯对队友非常友善，根据荷兰左闸戴利白兰特透露，韦格贺斯喺操练後帮佢擦乾净对波砵，希望呢位老大哥有波入。戴利白兰特今场食白果，反而韦格贺斯入2球，可能好心有好报。
