葡萄牙喺世界盃8强以0比1不敌摩洛哥，被淘汰出局，领队费兰度山度士孭晒镬，根据葡萄牙《球报》民意调查显示，有53.9%球迷认为呢位68岁主帅系罪魁祸首，至於近期被贬为後备嘅C朗，只有7.6%人认为佢系球队出局主因。
葡萄牙16强对瑞士，费兰度山度士大胆将C朗放後备席，结果大胜6比1，赢得掌声。今仗对摩洛哥，费帅照办煮碗，但结果大不同，葡萄牙面对呢支非洲球队严密防守，显得老鼠拉龟，无从入手，特别系上半场组织唔到攻势，往往只能靠长传，毫无威胁可言。
结果葡萄牙今届踢到第5场比赛，首次入唔到波，反映费兰度山度士唔识变通，对住擅长防守嘅摩洛哥，毫无应对之策，难怪大部分人认为佢要为球队出局负最大责任。
另外，有22.8%认为葡萄牙球员发挥差系出局主因，有10.5%人指摩洛哥表现超水准，令葡萄牙难以招架。只有7.6%人指C朗近期负面新闻影响球队晋级，有5.2%人指球证执法水平差令葡军被淘汰。
