法国今届衞冕之旅，大部份球迷都将希望放喺基利安麦巴比身上，呢位法国新球王亦有出色表现，不过每次当基利安麦巴比受到对手紧盯，基奥特就会挺身而出，8强对英格兰嘅致胜球系佢今届世盃第4个入球，喺射手榜同美斯睇齐，只系落後榜首基利安麦巴比1球。
法国上届赢世盃冠军，正选前锋基奥特1球未入，今届佢已经有4个入球，当中3个系为法国领先嘅重要入球，含金量极高。法国首场对澳洲先失守，又系基奥特攻入2粒反胜4比1，16强对波兰靠基奥特先开纪录，今场对英格兰再顶入致胜球，每球都非常关键。
36岁嘅基奥特赛後获选为今场最佳球员，连同佢喺2014世盃亦有1个入球，目前累积5个世盃入波，系法国史上第6个喺世盃入5球或以上球员，之前5个分别系方亭(13球)、基利安麦巴比(9球)、亨利(6球)、施丹(5球)同柏天尼(5球)。
