阿根廷喺世盃4强对克罗地亚前面临打击，国际足协宣布就8强阿根廷对荷兰一仗，就两队嘅违规行为展开纪律调查，当中美斯同达米安马天尼斯将成焦点人物，佢哋赛後对执法球证嘅攻击，最坏情况会系停赛处分，严重影响阿根廷嘅备战。
阿根廷对荷兰一仗尾段出现冲突场面，柏利迪斯用波省向荷兰後备席、华基尔云迪积克恶意撞跌对手等都系明显调查目标。西班牙《马卡报》报道，美斯同达米安马天尼斯赛後肆意批评球证马图拉贺斯，随时惹嚟一身蚁。
美斯赛後已经知乱讲嘢随时出事，但都忍唔住：「我唔想讲球证，因为我可能会被罚停赛。我哋赛前已经担心紧呢个球证，我唔想讲太多，国际足协应该检讨下，国际足协唔可能派一个唔够班嘅球证嚟执法呢场大战。」相比之下，门将达米安马天尼斯言论更加激烈，直斥马图拉贺斯「狂妄自大」，甚至质疑该西班牙球证因为见自己国家队出局，所以都想将阿根廷搞死埋。
美斯因为「唔收口」而被国际足协停赛早有前科，2017年一场世盃外围赛对智利，美斯因为辱骂旁证被国际足协罚停赛4场，不过当佢完成第1场停赛後，国际足协判佢上诉得值，唔需要履行其余3场停赛。阿根廷喺4强有马高斯阿古拿同干沙路蒙迪尔因累积黄牌停赛。
