随住日本国家队的卡塔尔世界盃之旅正式终结，日本职业球季亦正正式式落幕！日本国家队接连击败德国、西班牙两支欧洲劲旅杀入十六强、浦和红钻打入亚冠盃决赛、横滨水手重夺日职联冠军等画面，对於各日本球迷嚟讲依然系如痴如醉；而喺日本2022职业球季正式结束呢一刻，伴随住就有唔少人员变动，今日就同大家作一个小总结。
日、朝名将急流勇退
讲到季尾最瞩目的引退消息，首推中村俊辅宣布挂靴。呢位44岁的左脚王，刚季效力FC横滨期间成功协助球队取得升上日职联资格，总算为佢的职业生涯画上圆满句号。事实上，中村俊辅刚季一路受到右足踝伤患困扰，上阵时间甚少，喺球队亦慢慢成为精神领袖，如今宣布挂靴都可以话系相当合理。
除了中村俊辅，另一效力日乙球会町田泽维亚的前北韩国脚郑大世亦宣布挂靴。38岁的郑大世可以话系北韩近年最为人熟悉的球员，2010年代表北韩出席南非世界盃唱国歌时泪流满面的一幕依然教人记忆犹新。
球会层面方面，郑大世喺日职联先後效力过川崎前锋、清水心跳、新泻天鹅及町田泽维亚，喺J1及J2合共射入111球，说得上系日本球坛的殿堂级人物之一；此外佢亦试过外流德国效力波琴同科隆，话佢系北韩近年最成功的球员绝不为过。
传统劲旅誓要发愤图强
横滨水手勇夺日职联冠军、广岛三箭赢得联赛盃，日乙球会甲府风林更爆冷赢得天皇盃，打破了传统大会垄断的局面。而部份传统劲旅经历了一个失望的球季，已经急不及待进行大变动务求喺下季嚟个大反弹。
鹿岛鹿角招揽新血
鹿岛鹿角上届再次三大皆空，更与下届亚冠联的资格无缘，对於领导层嚟讲绝对系唔收货。上季季中接手执教球队的名宿岩政大树获得留任，下季真系要有成绩交出先得，而为了改善成绩，佢哋首先由川崎前锋招揽前锋知念庆加盟，知念庆去季为川崎前锋喺日职联射入7球，鹿岛鹿角得到佢的加盟相信可以分担一下铃木优磨的入球责任。
除了知念庆，鹿岛鹿角亦获得藤井智也由广岛三箭来投。藤井智也年仅24岁，司职右中场或者右翼衞，上季佢的表现就相当抢眼，可说是广岛三箭取得好成绩的重要功臣之一，而佢平均每场可以制造6次传中，数据系全日职联最佳，鹿岛鹿角来季靠晒佢加强侧击能力。
浦和红钻、大阪飞脚齐齐换教头
浦和红钻虽然成功杀入亚冠联决赛，但喺本土就冇乜成绩交出，因此球会宣布撤换西班牙籍监督列卡度洛迪古斯，来季改由波兰籍的史哥沙执教。50岁的史哥沙执教经验丰富，曾经带领波兰球会克拉科夫及列治普斯南赢得国内联赛及盃赛冠军，亦去过中东阿联酋U-23国家队。唔通浦和红钻眼见广岛三箭进行欧洲化改革成功，来季又想有样学样？
至於仅仅护级成功的大阪飞脚，来季领导层亦有变动，西班牙籍教头普耶图斯将在来季取代松田浩担任监督一职。普耶图斯之前就执教日乙球会德岛漩涡，球会成绩虽然唔算突出，但喺日乙就以防守稳健见称，大阪飞脚搵佢加盟似乎真系想补救後防经常穿窿的弊病。
星级战将外闯求突破
日本近年喺国际赛成绩不俗，除了得益於健全的青训体系不断为球坛补充新血外，日本球员充满冒险精神、勇於外流寻求新挑战亦系原因之一，而喺来季又有两位国脚级人马宣布外流。
川崎前锋中坚谷口彰梧，刚刚有份代表日本国家队出战世界盃决赛周，而佢表现亦都唔失礼，对於31岁的佢可以话系达到球员生涯的顶峰。球员生涯里面一直只系为川崎前锋效力的佢，近日就决定喺2023球季展开外流生涯，加盟卡塔尔球会艾雷恩，展开掘金之旅。
事实上，谷口彰梧本身年纪都唔细，既然喺世界盃有出色表现之下获得赏识得到掘金机会，绝对系千载难逢，又睇下佢可唔可以好似广岛三箭老将盐谷司当年咁，喺中东闯出一番事业喇！
如果谷口彰梧系老将，咁效力神户胜利船的小林友希绝对称得上系後辈，呢位22岁中坚近日就落实喺2023年1月转投苏超班霸些路迪，成为些路迪阵中第4名日本球员。小林友希上季为神户胜利船喺各项赛事上阵达41场，可说是球队的主力，而佢本身亦代表过日本U-21，如果可以喺些路迪好好把握机会，晋身大国脚可以话系指日可待。
功勳战将离队延续生涯
球场始终系英雄地，部份球员年纪渐长难以跟得上球队需要，即使曾经为球队立下唔少汗马功劳，最终都系难逃离队命运。喺横滨水手出道、协助过球会赢得2次日职联冠军、2019年日职联MVP的仲川辉人，近日就宣布离队转投FC东京。
仲川辉人身材矮小，但速度快又技术好，过往喺横滨水手前线往往制造出唔少威胁，不过球队近年锐意年轻化，前线又有唔少新星上位，间接令呢位30岁翼锋的上阵时间开始减少，难怪要转会寻求新突破。虽然已经事先张扬离队，但仲川辉人喺早前对阵罗马的友赛依然获得上阵机会，等佢可以好好同一众横滨水手球迷进行道别，以佢喺横滨水手的江湖地位，相信日後代表FC东京返嚟倒戈，都会受到横滨水手球迷的热烈欢迎。
此外，多年先後为大阪飞脚效力多年的巴西中锋安达臣柏德列，最近亦宣布会喺来季转投京都不死鸟。35岁的安达臣柏德列拼劲十足，当打年代喺前线有相当大的冲击力，而佢最大成就当然要数喺2014球季协助大阪飞脚完成日本本土三冠王壮举，佢自己亦喺当季成为日职联MVP，可以话系名利双收。安达臣柏德列前後为大阪飞脚效力6季半，喺各项赛事合共射入85球，佢的离队相信亦会得到大阪飞脚球迷的怀念。
呢一刻唔少日职球队都已经进入放假阶段，以好好准备之後的冬季集训去迎接新球季；而相信踏入1月转会市场重开後，将会有更多瞩目的转会消息出现，各位日职联球迷到时记得密切留意。
【J.LEAGUE香港情报站】日职联每月精选 （11月）
