荷兰将会喺世盃8强大战阿根廷，胜负关键好可能系於「球王」美斯身上，赛前荷兰领队尹戈尔就豪言，佢已经搵到美斯嘅弱点，不过呢位战术大师就懒神秘唔肯透露更多详情，只系叫球迷到时放长双眼睇佢嘅部署！
荷兰同阿根廷喺2014年世盃准决赛交锋，当时两队踢足120分钟都冇波入，最後阿根廷互射12码赢荷兰出线。荷兰主帅尹戈尔赛前表示：「美斯系最危险嘅创造型球员，佢可以为队友制造攻门，亦可以自己入波。不过当阿根廷防守嗰阵，美斯嘅参与唔多，呢一点会系荷兰嘅机会。」当记者追问实情部署系点样，尹戈尔就回应：「我唔会同你讲，到时你就会睇到。」
尹戈尔话有办法对付美斯，不过似乎连佢嘅手下都未知点做，效力巴塞隆拿嘅中场法兰基迪庄同美斯做过2年队友，佢就话唔知用咩方法对付美斯：「我好熟美斯，但唔肯定点样可以阻止到佢，佢喺过去15年一直主宰比赛，但系都冇人有办法阻到佢，或者要靠全队合作先至有机会。」
至於荷兰中坚华基尔云迪积克，过去喺球会同国家队已多次同美斯交锋，佢赛前就试图淡化美斯嘅重要性：「今场唔系我对美斯，亦都唔系荷兰对美斯，而系荷兰对阿根廷，冇球员可以一个人踢晒场波，我哋会有一个合适嘅作战计划。」
