法国喺世盃16强淘汰波兰一仗，守将祖利斯古迪因为戴住金链比赛，而被球证勒令要除低条链，咁罕见嘅场面喺世盃出现即成热话。法国领队迪甘斯日前爆料，话呢位效力巴塞隆拿嘅球星平时操练都有戴金链，因为佢迷信咁样会有好运。
祖利斯古迪对波兰一役，踢咗差唔多半场先被球迷发现戴住金链比赛，而球例系严禁球员佩戴任何颈链、手表等物品落场，迪甘斯表示：「祖利斯古迪唔应该咁做，我以为佢(赛前)已经除咗落嚟，呢一点系我哋嘅错。祖利斯古迪份人好迷信，佢平时操练都会戴住条金链......」
祖利斯古迪今届4场比赛参与3场，其中对丹麦同波兰都系正选上阵，由於班捷文柏华特同迪甘斯被传不和，祖利斯古迪嘅位置就更加稳阵。
