今届世盃打破传统，改喺11月举行，赛程亦比以往频密，小组争持相当激烈，出现多个令人称奇嘅数字。难得有个16强同8强之间嘅小空档，一於同大家回顾分组赛点滴，齐齐用「数字说故事」。
「0」
竞争空前激烈 冇一队全胜
今届竞争非常激烈，个别小组踢完两轮後，4队都仲有出线机会，更罕见嘅系，3轮分组赛後，冇一队波可以全胜拎晒9分，系自1998年分组赛增加至32队以嚟首次。当中荷兰、英格兰同摩洛哥2胜1和得7分，已经系最好成绩。
「1」
最弱主办国 卡塔尔入到波
卡塔尔被球迷封为「最弱主办国」，结果真系3战全败，创下世盃史上东道主最差成绩，最终以0分黯然遭淘汰。好彩佢哋对住荷兰都入咗一球，从好嘅方面睇，卡塔尔起码入到波，避过成为零胜、零分、零入球的「三零部队」，亦令2002年杀入决赛周嘅中国队，继续背负世盃决赛周史上唯一一支亚洲「三零部队」。
「1.88」
1.88mm奇迹 日本争议晋级
日本喺分组生死战，以2比1反胜西班牙，但田中碧所入嘅第二球就充满争议性，当时三笘薰底线传中前，皮球睇落99%出咗底线，但VAR审视过後判入球有效。日本传媒指个波接触白界线只有1.88毫米，更誉为「1.88mm奇迹」。
「5」
五朝元老多 命运各有不同
墨西哥门将奥祖亚、中场古亚达度、葡萄牙C朗及阿根廷美斯，都系世盃难得一见嘅「五朝元老」，4人全部都有上阵，但前两者因墨西哥32年嚟首次入唔到淘汰赛而缘尽卡塔尔。两位球王则各创纪录，C朗连续5届入波属史上第一人，而美斯则连续5届贡献助攻，亦系新创举。
「7」
阿根廷斗沙特 半场狂越位
阿根廷对沙特嘅比赛，阿根廷队上半场被吹罚7次越位，其中包括3次食诈胡，结果沙特半场落後一球下，下半场神奇连入两粒，反胜阿根廷震惊球坛。
「18」
最年轻正选兼入波 加维威尽
西班牙嘅加维喺血洗哥斯达黎加7比0一役，以18岁109日之龄，成为世盃史上最年轻正选球星。呢位巴塞隆拿新星更射入一球，成为今届最年轻「士哥拿」，以及世盃第3年轻入波球员。
「24」
球星多顾虑 半场少交收
今届世盃破天荒喺欧洲球季中间举行，一班国脚踢完世盃後，又要即刻返球会报到，准备下半季联赛。未知系咪因为咁，搞到班球星喺分组赛都有啲顾虑，唔会去得太尽，令到比赛初段入波偏少。结果今届48场分组赛，就出现24场半场0比0比数。
「68」
艾方素戴维斯 闪电式破关
阔别世盃36年嘅加拿大，今届亦创出一个纪录，喺对克罗地亚一战，艾方素戴维斯68秒嘅头槌破网，成为分组赛最快入波，但佢哋最终仍以1比4不敌对手。呢支下届世盃主办国之一嘅球队，亦以3战全败入2球失7球毕业。
「103」
超长补时增加有效比赛时间
B组伊朗对英格兰，喺补时13分钟入波追成2比6，官方数字系「90+13」，即系103分钟入波。事实上呢场波由於多波入又多换人，仲有球员受伤，上半场补时长达14分钟，下半场补足15分钟，创出补时纪录。对於今届补时特别长，国际足协裁判委员会主席哥连拿就话，目的系想增加有效比赛时间。
「500」
C朗「头发冤案」高科技话事
葡萄牙火并乌拉圭一役，下半场54分钟般尼费南迪斯半传半射，C朗禁区内跳顶，个波喺佢头顶越过，直入网窝。C朗当时话自己头发掂到个波，入球应该入佢数，引来争议。赛後足球生产商adidas特别发出声明：「我哋喺Al Rihla（官方足球）中加入咗最先进嘅接触技术，肯定C朗喺呢个入波当中，完全冇点到个波。皮球入面嘅500Hz IMU感认器，有高度准确性分析。」
「88,966」
阿根廷生死战 劲多球迷入场
阿根廷小组次轮对墨西哥，影响佢哋出线命运。据官方公布数字，鲁赛尔球场共有88,966位球迷入场，创下28年来世盃最高入座纪录，对上一次有咁多人入场的世盃赛事，已经要数到1994年世盃决赛，当时美国玫瑰碗体育场有成91,194观众。
「2,522,000」
南韩型男踢好波 粉丝激增
南韩对加纳嘅分组赛，「太极虎」一度落後两球，及後赵圭成下半场梅开二度追至2比2，虽然南韩最终都要输2比3，但赵圭成嘅社交网followers人数因此激增，由未入波嘅84万，完场後半个钟已经升至100万。南韩喺16强不敌巴西後，呢位型男嘅「追随者」更超过252万，相当夸张。
