澳洲喺世界盃16强以1比2不敌阿根廷，黯然出局，但整体表现并唔差，新星加兰古奥披甲创出壮举，以18岁零79日成为自1958年巴西球王比利之後，近64年世界盃淘汰赛最年轻上阵球员，前途无可限量。
加兰古奥今年9月先至首次入选澳洲国家队，更加晋身出战世界盃大军名单，澳洲首仗对法国，呢位前锋後备上阵，成为球队史上最年轻踢世界盃嘅球员，亦系赛事史上第9年轻上阵球员。
加兰古奥对上2场分组赛都冇上阵，来到今场16强第72分钟，呢位小将再次获得机会，後备入替马菲历基，成为近64年世界盃淘汰赛最年轻上阵球员，仅次於1958年嘅比利，当年比利踢世界盃淘汰赛，只系17岁零249日。
加兰古奥都算好脚头，只系上阵5分钟，澳洲就入波追至1比2，佢仲有1次射门几乎入波，可惜未能扳平。
来自一个南苏丹家庭嘅加兰古奥，出世冇耐就跟随父母及家人，以难民身份移居澳洲，佢自细已展现超卓足球天份，被英超「新土豪」纽卡素睇中，9月中同加兰古奥达成协议，将於明年1月转会市场重开後正式加盟，相信球迷好快可以睇到加兰古奥喺英超献技。
