法国球星如云，不时传出内讧消息，最近又发生一单不和事件，根据英国《太阳报》爆料，以奥士文尼迪比利为首嘅派系，要求主帅迪甘斯弃用右闸班捷文柏华特，但以基奥特为首嘅派系力撑呢位上届夺冠功臣，令迪甘斯排阵方面非常为难。
法国首场分组赛对澳洲，因为班捷文柏华特犯错，导致先失波，据报赛後奥士文尼迪比利等几位球员对於呢位拜仁慕尼黑後衞非常不满，甚至要求迪甘斯弃用佢。不过，基奥特认为应该畀机会班捷文柏华特。
今次派系斗争之中，奥士文尼迪比利占上风，法国之後2场分组赛，班捷文柏华特都冇得再上阵。不过，迪甘斯反驳内讧传闻，声称弃用班捷文柏华特系佢自己决定：「我同柏华特倾过几次，佢状态唔好，唔适合比赛，系我决定收起佢。」
班捷文柏华特上届世界盃16强对阿根廷，射入世界波，成为球队反胜嘅最关键入波，估唔到4年之後，却变成罪人，遭队友针对，真系世态炎凉。
