巴西喺世界盃G组最後1战，0比1不敌喀麦隆之余，仲有左後衞阿历士迪尼斯受伤，加上另1位左路守将阿历士辛度亦有伤在身，令「森巴兵团」主帅迪迪面临冇正宗左闸可用嘅困境。
巴西正选左後衞阿历士辛度对瑞士一役伤出，今场由阿历士迪尼斯担任正选，但呢位被曼联外借去西维尔嘅守将下半场防守角球时，同队友法宾奴泰华利斯相撞受伤，退下火线，成为巴西今届第4位伤兵，另外3位系尼马、阿历士辛度、丹尼路雷斯。
据悉阿历士辛度已经肯定无缘16强对南韩，如果阿历士迪尼斯都唔踢得，届时可能要用中坚马昆奴斯哥利亚客串左後衞，令巴西防线出现隐忧。
